Ætti að færa umferðareftirlit frá lögreglu?

Maður veltir því fyrir sér hvort umferðareftirlitið sé ekki betur komið hjá öðrum aðila en lögreglunni. Hún virðist ekki hafa mikinn áhuga á að sinna því.

Kannski ætti að færa umferðarbrot undan refsilöggjöfinni og setja þau upp sem gjaldskyld brot á sambærilegan hátt og stöðubrot. Þannig væri hægt að láta sérstakan aðila sinna umferðareftirliti. Til dæmis fyrirtæki á vegum sveitarfélaganna eins og stöðumælaverði eða verktaka sem fengi verkið eftir útboð. Frjálshyggjumenn ættu nú að geta fagnað því að geta einkavætt þetta verkefni.

Lögreglan gæti þá fengist við raunverulega glæpamenn í staðinn.

„Plastpokaskilti“ verða tekin niður

Athugasemdir

[Morten Lange, 13.5.2011 kl. 09:59]

Þetta er róttæk tillaga, og kannski svolítið haft í flintingum ?   

"raunverulegir" glæpamenn  ....

En vissulega er þetta viðhorf lögreglu skrýtið eins og það birtist í fréttinni !  

[Árni Davíðsson, 13.5.2011 kl. 17:36]

Mér er alvara.

Ég held að það ætti heldur ekki að vera verksvið lögreglu að samþykkja þessi merki eins og segir í 85. gr. umferðarlaga: "Eigi má án leyfis lögreglustjóra (vegamálastjóra) setja merki skv. 1. mgr. 84. gr. á eða við veg. "

Það væri eðlilegra að það væri t.d. á verksviði nýju Farsýslunnar eða Vegagerðarinnar.  Á bak við ákvörðun um umferðarhraða hljóta menn að leggja til grundvallar hönnunarhraða vegar og markmið sveitarfélags í umferðaröryggismálum ekki hvort löggan hafi áhuga á þessu eða ekki.

Ef löggan getur ekki sinnt verkefninu á einfaldlega að fela öðrum það sem getur sinnt því.