Hjólað í vinnuna á Sauðárkróki

Á 10. áratugnum var ég að vinna á Sauðárkróki í smá tíma.

Bærinn er fallegur og stendur undir háum bakka svipað og á Akureyri. Sauðkrækingar hafa ekki byggt uppi á Nöfunum, eins og landið uppi heitir víst, eins og Akureyringar sem hafa fært bæinn upp á bakkann. Þess í stað hafa þeir byggt hverfi suður af bænum en á milli stendur Fjölbrautarskóli Norðurlands vestra og stærstu íþróttamannvirkin. Á milli liggur gata og gatnamót þar sem Sauðkrækingar voru með asatíð fjórum sinnum á sólarhring þegar ég var þar þegar þeir flykktust á milli í bílunum sínum.

Vonandi er þetta allt breytt núna því þegar málið er skoðað kemur í ljós að Sauðárkrókur er samanþjappaður bær og stutt á milli allra staða. Alveg kjörinn til að hjóla eða ganga milli vinnu og heimilis.

Á kortinu hér að neðan hefur verið dreginn hringur með radíus (geisla) 1,6 km. Hjólreiðamaður er um 6 min. að hjóla þann radíus eftir götum eða stígum. Gangandi vegfarandi er um 15 min að ganga það sama. Allur Sauðárkrókur rúmast innan smá hrings þar sem tekur um 6 min að hjóla inn að miðju. Vegalengdir eru greinilega ekki farartálmi innan Sauðárkróks.

 

 

 

 

 

 

 

 

Hafgolan getur verið leiðinleg á Króknum en því gætu íbúar breytt með því að setja upp grænu húfuna, þ.e. með því að auka trjá- og runnagróður í bænum.

Hjólað í vinnuna er frábært tækifæri

Nú er tækifærið fyrir íbúa á Króknum að taka þátt í Hjólað í vinnuna. Bæta heilsuna og taka upp hollari lífsstíl og gera umhverfi bæjarins betra með smá mannlífi.
 
Færri bílar í umferðinni þýða minni hættu fyrir börnin á leið í skólann og meiri tækifæri fyrir fólk til að hittast.
 
Nánar á vef verkefnisins:

http://hjoladivinnuna.is/

Athugasemdir

[Hjóla-Hrönn, 6.5.2010 kl. 11:29]

Á undanförnum tveimur árum hef ég heimsótt nokkra bæi hér og þar á landinu sem er alveg ótrúlega auðvelt að hjóla í.  Akranes, Selfoss, Hveragerði, Hvolsvöllur, Þorlákshöfn, Stokkseyri, Eyrarbakki, allir bæjir á Reykjanesskaganum.  Þessi bæjarstæði eru algjörlega flöt og þess vegna kjörið fyrir fólk að koma sér upp margs konar hjólagræjum (eins og maður sér í Kaupmannahöfn).  Varð satt að segja hissa að sjá hversu fáir voru á hjólum.

[Árni Davíðsson, 6.5.2010 kl. 12:05]

Þar er ég sammála þér Hrönn.

Verst hvað vegalengdir eru stuttar á þessum stöðum, maður getur ekki hjólað nóg.