Aurhlíf fest á gaffal með dempara

Á veturna er tjörudrullan á höfuðborgarsvæðinu hvimleið fyrir reiðhjólamenn eins og fleiri vegfarendur.  Til að minnka drulluausturinn og bleytuna er nauðsynlegt að hafa góðar aurhlífar eða bretti á hjólunum.

Fjallahjólið mitt er ekki með festingar að framan fyrir aurhlífar enda með dempara að framan. Ég var lengi vel með aurhlíf sem festist upp í stýrispípuna og gaf alls ekki nógu góða vörn eins og sjá má á myndinni.

Núna um daginn lét ég loksins verða af því að festa almennilega aurhlíf og bætti drullusokk við að neðan.

Það er ekkert skrúfugat til að festa aurhlífina. Þó að sennilega væri í lagi að bora gat fyrir skrúfu í "gaffalbrúnna" vildi ég ekki hætta á það og brá því á það ráð að festa aurhlífina með bendlaböndum. Aurhlífin er úr harðplasti og auðvelt að bora í gegnum hana fyrir bendlaböndunum. Bendlabönd eru ódýr, sterk og endingargóð og ótrúlega nytsöm.

Eitt sem þarf að passa sérstaklega með V-bremsur er að aurhlífin hindri ekki hreyfingu bremsunnar. Hér liggur hún undir bremsunni.

Hér til hliðar sést festingin að aftan. Uppi er gamla festingin fyrir gömlu aurhlífina.

Öðru megin á gafflinum er hægt að festa í skrúfugat fyrir diskabremsu. Gott er að eiga úrval af skífum og ryðfríum skrúfum í mismunandi lengdum sem fást í byggingarvöru- eða vélaverslunum.

Hinum megin á gafflinum er ekkert skrúfugat og þar er hlífin fest í hosuklemmu af passlegri stærð sem festist utanum gaffalinn.

Drullusokkurinn er síðan punkturinn yfir i-ið. Hann er klipptur til úr gömlu afgangsdekki og festur við aurhlífina með bendlabandi.

Sennilega má drullusokkurinn samt vera breiðari og jafnvel aðeins síðari.

 

 

 

Þetta hefur reynst ágætlega og gefur miklu betri vörn fyrir bleytu og drullu.

Maður hefði auðvitað átt að vera búin að gera þetta fyrir löngu síðan.

Athugasemdir

[Hjóla-Hrönn, 16.2.2010 kl. 12:07]

hehe, sniðug lausn hjá þér.  Ég er með drullusokk á núverandi hjóli og það er algjört möst.  Hann var að vísu úr fullþunnu efni og orðinn svolítið rifinn, en ég teipaði hann saman með einangrunarlímbandi.  Þá varð hann stífari og virkar mun betur, skrapast ekki utan í nöglunum.

[steinimagg, 16.2.2010 kl. 21:53]

[Jens (IP-tala skráð) 17.2.2010 kl. 14:46]

Er þetta "afturbretti" hjá þér? Mér sýnist það ná svo langt fram.

kv.

jens

P.s. Gettu hvað kemur upp þegar maður googlar "Árni drullusokkur"

[Árni Davíðsson, 17.2.2010 kl. 23:31]

Takk fyrir athugasemdirnar.

Þetta er frambretti en fer sennilega framar en venjulega því það stoppar við gaffalbrúnna en ekki við gaffallinn eins og eðlilegt væri. Samanber hallan á "stífunni".

Þetta er frá "Biltema" sem margir þekkja frá Norðurlöndum. Sú verslun er eins konar Bílanaust með fjölbreyttara vöruúrval þar á meðal hjól og varahluti. Þetta eru fín bretti, ódýr og endingargóð. Veffangið er www.biltema.se eða no eða dk eftir löndum. Þeir senda að vísu ekki í pósti.

Það er ekki amalegt að vera í hópi með fleiri Árnum þar sem drullusokkar koma við sögu.

[Jens (IP-tala skráð) 18.2.2010 kl. 08:31]

Já ég kannast ágætlega við Biltema. Vörulistinn þeirra var uppáhalds klósettlestrarefnið mitt þegar ég bjó í Finnlandi.