Skynsamlegar áherslur í samgöngumálum

Ég bloggaði fyrir nokkru um hraða mismunandi samgöngumáta á höfuðborgarsvæðinu. Nú hefur  Umhverfis- og samgöngusvið Reykjavíkur endurtekið umferðarkannanir eins og greint er frá í  frétt Samgönguskrifstofunnar innan sviðsins. Niðurstaðan var að ferðahraði hafi aukist í samkvæmt könnun á aksturshraða og umferð hefur minnkað samkvæmt sniðtalningu.

Hver er þá skynsamleg áhersla í samgöngumálum til að gera umferð greiðari?

Á að eyða 15 milljörðum í mislæg gatnamót við Kringlumýrarbraut - Miklubraut eða á að fækka bílum á götunum með því að gera aðra samgöngumáta meira aðlaðandi, t.d. með:

• stofnbrautum fyrir reiðhjól
• forgangsakreinum fyrir strætó
• samgöngusamningum á vinnustöðum
• auka jafnræði samgöngumáta í peningalegu og skattalegu tilliti

Er ekki skynsamlegt að fækka bílum með því að gera aðra samgöngumáta meira aðlaðandi og skapa þar með meira pláss fyrir þá sem áfram nota einkabílinn? Líkur benda til að það sé mun ódýrari kostur og skapi mun fallegra borgarumhverfi en ofuráhersla á stærri umferðarmannvirki. Gleymum því ekki að umferðarteppurnar skapast ekki af þeim sem ganga, hjóla eða taka strætó. Síðast þegar ég vissi voru þetta allt einkabílar í umferðarteppunum.

Besti vinur einkabílsins er ekki bílstjóri í einkabíl heldur sá sem gengur eða hjólar.

Ferðatími styttist á milli hverfa

Niðurgreiða Kópavogsbúar vatnið fyrir Garðbæinga?

Eins og menn muna fór meirihlutinn í Kópavogi með fyrrverandi bæjarstjóra Gunnar Birgisson í broddi fylkingar út í það að byggja vatnsveitu í landi Kópavogs í Heiðmörk.

Það var partur í þeirri fléttu að flytja hesthúsin úr Glaðheimum. Til að geta komið hesthúsahverfinu á nýtt svæði á vatnsverndarsvæði þeirra Garðbæinga þurfti að létta af vatnsvernd og leggja niður vatnsból Garðabæjar við Dýjakróka við Vífilstaðavatn. Í samningum við Garðabæ var samið um sölu á vatni til Garðabæjar til næstu 40 ára á verði sem var langt undir kostnaði við vatnsöflun Kópavogs. Gera má ráð fyrir að verð við vatnsöflun í Kópavogi sé vel yfir 10 kr/tonnið, sennileg ágiskun er 12-16 kr/tonnið. Þetta vatn selur Kópavogur síðan Garðabæ á 5 kr/tonnið og hluta af þessu vatni selja Garðbæingar síðan Álftnesingum á 18 kr/tonnið.

Vatnsgjald sem íbúarnir borga í fasteignagjöldum er þjónustugjald og óheimilt að hafa þetta gjald hærra en sem nemur kostnaði við að veita þjónustuna. Í þessu tilviki virðist þó sem á Kópavogsbúar greiði fyrir vatnsnotkun Garðbæinga með vatnsgjaldi sínu. Hvernig getur það staðist lög?

Þeir sem niðurgreiða þetta dæmi eru skattgreiðendur í Kópavogi sem með þessu fá en og aftur að njóta fjármálasnilli Gunnars og meirihluta sjálfstæðisflokks og framsóknarflokks.

Árið 2007 skrifaði ég grein um Glaðheimamálið og fleira. Útkomunni úr því hefur ekki verið gerð fullnægjandi skil en það virðist ljóst að bærinn hefur lagt í um 5 milljarða kostnað við að koma hesthúsunum burt. Hinsvegar hefur hann ekki fengið þá rúmlega 6 milljarða sem byggingaraðilarnir ætluðu að greiða fyrir landið. Þarna átti að rísa gríðarlegt byggingarmagn með um 100.000 bíla umferð á sólarhring á Reykjanesbraut.

Og hestarnir? Þeir eru en í Glaðheimum!

Vatnið margfaldast í verði

Eru tryggingafélögin helstu bótaþegar Tryggingastofnunnar?

Hér er til umfjöllunar í dómssal mjög alvarlegt slys sem varð á Vesturlandsvegi í Mosfellsbæ. Það varpar ljósi á starfsemi tryggingafélaganna sem eins og menn muna voru búnir að safna digrum bótasjóðum fyrir hrun.

Í fréttinni segir: VÍS hafi greitt stúlkunni fullar bætur miðað við lágmarkstekjuviðmið skaðabótalaga að frádregnum greiðslum frá Tryggingastofnun ríkisins. Tryggingafélagið tryggir ökutækið miðað við útreikninga tryggingastærðfræðings og greiðir bætur en dregur frá greiðslur frá Tryggingastofnun ríkisins (TR). Spyrja má hvort í útreikningum stærðfræðingsins sé tekið tillit til þess að útgreiðsla tryggingafélagsins verður lægri vegna þess að TR stendur skil á hluta fjárhæðarinnar sem sá er fyrir tjóninu varð fær í bætur.

Eru tryggingafélögin helst bótaþegar Tryggingastofnunar ríkisins? Hverjir sömdu frumvarpið sem síðar varð að lögum um vátryggingarstarfsemi? Hversvegna gátu tryggingafélögin safnað bótasjóðum sem urðu langtum stærri en samanlagðar bætur fyrir öll þau tjón sem þau mundu nokkurn tímann greiða? Voru bótasjóðirnir notaðir til að útiloka samkeppni þegar erlend tryggingafélög reyndu að hasla sér völl á 10 áratugnum? Hvernig stóð á því að fjárglæframönnum og útrásarvíkingum tókst að læsa klónum í bótasjóð Sjóvá Almennra og tapa honum öllum og meira til í áhættufjárfestingum í Asíu án þess að Fjármálaeftirlitið hindraði það?

Er ekki komin tími til þess að lögum um vátryggingastarfsemi verði breytt og tryggt að bótasjóðir tryggingafélaganna vaxi ekki aftur í þá stærð að þau verði úr takti við hugsanlega útgreiðslu bóta? Eiga tryggingafélögin ekki að hætta að vera á spena Tryggingastofnunar ríkisins?

Bótakröfu vegna alvarlegs slyss hafnað

Ætlar þú að aka á barnið þitt í dag?

Það er alltof algengt að bílstjórar sýni börnunum okkar og sínum alltof litla tillitsemi í umferðinni. Akstri á að haga eftir aðstæðum og þar sem er myrkur og mikið af gangandi fólki þarf að taka tillit til þess. Aka hægar og líta vel eftir gangandi og hjólandi vegfarendum. Það eru bílstjórar bakvið stýrið á þeim bílum sem slasa og drepa fólk. Liggur mönnum svona lífið á að komast í ræktina?

Menn komast ekkert hraðar áfram þótt þeir hamist og hemli á 50 m fresti. Umhverfis- og samgöngusvið Reykjavíkurborgar mældi meðalhraða bíls á sex leiðum á morgnana og síðdegis í október 2008. Meðalhraði bíls á þessum sex leiðum var um 32 km/klst. Meðalhraði reiðhjóls er á bilinu 15-25 km/klst í Reykjavík. Þá er ekki verið að reyna neitt sérstaklega mikið á sig.

Barnið sem þú sérð ganga á gangstéttinni er barnið þitt. Ætlar þú að aka á barnið þitt í dag?

Maðurinn sem er á leiðinni yfir gangbrautina er bróðir þinn. Ætlar þú að aka á bróðir þinn í dag?

Konan á hjólin framan við þig er systir þín. Ætlar þú að aka á systur þína í dag?

Skjaldborg um gönguleiðir

Notið Linux kjánarnir ykkar

Þessi bloggfærsla er skrifuð á Ubuntu Linux. Ókeypis stýrikerfi sem er mjög stöðugt, öruggt og hefur aðgang að miklu magni ókeypis hugbúnaðar.

Maður fær sjálfvirkar öryggisuppfærslur og hægt er að stilla á sjálfvirka uppfærslu stýrikerfisins þannig að maður getur alltaf verið með nýjustu útgáfu stýrikerfisins með öllum nýjustu viðbótum og reklum.

Aðgangur er að miklu magni ókeypis hugbúnaðar sem maður velur af netinu í gegnum pakkakerfi sem gerir alla uppsetningu mjög einfalda.

Mynd af skjáborðinu þegar þessi færsla er skrifuð:

Rannsaka „svartan skjá dauðans“

Hjólað í vinnuna - með og mótvindur

Ég hjólaði í vinnuna í morgun í mótvindi og var um 55 mín. á leiðinni, meðalhraði var 18.1 km/klst og hámarkshraði 36.8 km.  Áttin hélst allan daginn þannig að á leiðinni heim var meðvindur. Heimferðin tók um 34 mín., meðalhraði var 28.9 km/klst og hámarkshraði 58.9 km. Þetta er nærri því að vera met hjá mér á heimleiðinni. Hjóluð var sama leið fram og tilbaka hér um bil. Leiðin heim var Mosfellsbær-Vesturlandsvegur-Höfðabakki-Smiðjuvegur-Nýbýlavegur-Kársnes en á leiðinni í vinnuna hjólaði ég Álfhólsveginn í staðinn fyrir Nýbýlaveginn.

Að meðaltali er maður jafn oft með meðvind og mótvind þannig að  það jafnar sig út. Þetta verður hinsvegar frekar strembið í miklum mótvindi þegar komið er út í auðnirnar í úthverfunum.

Við gætum verið búin að skapa skjólsælt umhverfi fyrir mörgum áratugum, ef sveitarfélögin á höfuðborgarsvæðinu hefðu haft nægilega framsýni, og ræktað tré á auðum svæðum í þéttbýlinu. Þess í stað var ræktaður skógur uppi á heiðum þar sem enginn býr eða ferðast til og frá vinnu. Það er auðvitað ekki of seint að rækta tré til að skapa skjól í þéttbýlinu en því miður virðist ekki vera unnið skipulega að því hjá sveitarfélögunum. Nema kannski hjá Mosfellsbæ þar sem mikið hefur verið gróðursett af trjám á auðum svæðum í bænum.

Ég veit, borgum fyrir eldsneytið með sköttum og vöruverði!

Í máli Ólafs Bjarnasonar kom fram samkvæmt fréttinni að eldsneyti á bílaflota Reykvíkinga kostar um 6 milljarða á ári. Varlega áætlað gæti meðgjöf með bílaeigendum í formi bílastæða verið um 3 milljarðar á ári á höfuðborgarsvæðinu og er þá ekki reiknað með verðgildi landsins sem  undir bílastæðin fer.

Er gáfulegt að borga eldsneyti fyrir 6 milljarða með óbeinum hætti í sköttum og vöruverði? Varla.

Hversvegna borgum við þá 3 milljarða fyrir bílastæði með óbeinum hætti í sköttum og vöruverði?

Plísss, finnið fyrir mig hagfræðing sem getur útskýrt fyrir mér og alþjóð að þetta sé skynsamlegt fyrirkomulag.

Rafmagnsbílar spara milljarða

Eðlileg breyting en ...

Það er ekki hægt að breyta lögum og láta þau gilda afturvirkt. Slíkum lögum yrði hnekkt fyrir öllum dómstólum því þau standast ekki stjórnarskrá né venjuleg skilyrði lagasetningar. Íslenska ríkið gerði þetta að vísu með neyðarlögunum, enda verður þeim hnekkt þegar þau koma fyrir dóm.

Ég er hinsvegar 100% sammála efni frumvarpsins eins og það er kynnt í fréttinni. Lán sem er veitt með veði í hlut á eingöngu að vera hægt að innheimta með lögtaki í hinu veðsetta. Það mun neyða lántakendur og lánveitendur til að sýna meiri ábyrgð í framtíðinni. Það þýðir að lánað verður fyrir lægra hlutfalli í hinu veðsetta og menn munu síður fá lán.  Þá munu menn að vísu væla í næstu uppsveiflu yfir því að geta ekki veðsett sig upp að eyrnasneplum til að kaupa einhvern óþarfa.

Ef þetta verður að lögum.

Opnar möguleikann á að skila lyklunum

Meðgjöf hins opinbera með bílaeigendum

Á höfuðborgarsvæðinu eru mörg hundruð þúsund bílastæði. Einhver hefur áætlað að um 3 stæði séu fyrir hvern bíl og því séu um 600.000 bílastæði á höfuðborgarsvæðinu.

Bílaeigendur þurfa að greiða beint fyrir afnotin af pínu litlu broti af þessum bílastæðum. Það eru bílastæðin í miðborginni og örfá stæði við Landspítala og Borgarspítala. Það eru varla nema nokkur þúsund stæði. Sennilega þurfa bílaeigendur að greiða beint fyrir innan við 0,5 % af öllum bílastæðum höfuðborgarsvæðisins.

Öll þessi bílastæði eru ekki ókeypis. Það er talið kosta að meðaltali ca. 300.000 að útbúa malbikað bílastæði með öllu því sem fylgir að undanskildu landverðinu undir stæðið. Ef stæðið er í bílastæðahúsi eða segjum í kjallara tónlistarhússins nýja kostar það margar milljónir að byggja hvert stæði. Heildarkostnaður við bílastæðin er svimandi hár jafnvel þótt ekki sé tekið tillit til landverðs, 300.000 kr/stæði * 600.000 stæði = 180 milljarðar kr. Árleg meðgjöf til bílaeigenda í formi ókeypis bílastæða hleypur auðveldlega á nokkrum milljörðum króna.

Það er greitt fyrir bílastæðin með óbeinum hætti, með sköttum og í vöruverði í verslunum. Hversvegna á hið opinbera og almenningur (í vöruverði) að niðurgreiða rekstur bilastæða fyrir bílaeigendur? Hvernig hagfræði er þetta? Af hverju borgum við ekki bensín og tryggingar á bílana líka með óbeinum hætti ef þetta er svona skynsamlegt fyrirkomulag?

Hættum niðurgreiðslum á bílastæðum og látum þá sem nota stæðin borga fyrir þau.

Stöðumælar betri en bílastæðaklukkur

Hjólað í vinnuna, Nesvegur-Kópavogur

Hjólað "í vinnuna" frá Nesvegi í Kópavog. Leiðin er sýnd á kortinu. Það er hægt að klikka á kortið tvisvar og fá þá stærri mynd.

Ferðin er sýnd á eftirfarandi myndbandi. Myndavélin tók mynd á 30 sekúnda fresti og voru myndirnar 57 talsins síðan tengdar saman í myndband þar sem ein mynd er sýnd á sekúndu. Það tekur því 57 sek. Ef myndbandið er skrýtið þarf kannski að klikka tvisvar á það.

 

Þessi ferð:
Vegalengd: 8,26 km
Meðalhraði: 18,41 km/klst
Ferðatími: 26,57 mínútur
Hámarkshraði: 30.1 km/klst
Vindur: Mótvindur
Úrkoma: Þurrt
Færð: Autt